بھولے بابا نے خواب میں آکر کہا تھا، دو نوجوانوں نے  6سال کے معصوم کا گلا کاٹ کر قتل کردیا

نئی دہلی. جنوبی دہلی کی لودھی کالونی میں سنیچرر کی رات دو لڑکوں نے نشے کی حالت میں 6 سالہ لڑکے کا گلا کاٹ قتل کر دیا۔ پکڑے جانے پر دونوں ملزموں کا کہنا تھا کہ انہیں بھولے بابا نے قربانی کا کہا تھا جس کی وجہ سے انہوں نے بچے کو قتل کیا۔

دہلی پولیس کے مطابق یہ واقعہ دہلی کے پوش علاقے لودھی کالونی میں سینٹرل ریزرو پولیس فورس (سی آر پی ایف) کے ہیڈ کوارٹر کے تعمیراتی مقام پر پیش آیا۔ اتوار کی رات دہلی پولیس کو لودھی کالونی سے پی سی آر کال موصول ہوئی کہ ایک زیر تعمیر عمارت میں دو افراد نے 6 سالہ لڑکے کا گلا کاٹا ہے۔

نیوز ایجنسی اے این آئی کے مطابق ان دونوں مشتبہ افراد کو موقع پر ہی گرفتار کر لیا گیا۔ ان لوگوں کو وہاں کام کرنے والے دوسرے مزدوروں اور سی آر پی ایف کے اہلکاروں نے پکڑ لیا۔ جاں بحق ہونے والا بچہ تعمیراتی سائٹ پر کام کرنے والے مزدور کا بیٹا تھا۔ جو اتر پردیش کے بریلی کا رہنے والا ہے۔

پولیس کے مطابق قتل کے دونوں ملزم وجے کمار اور امن کمار بہار کے رہنے والے ہیں۔ یہ دونوں تعمیراتی جگہ پر سیمنٹ کٹر کا کام کرتے تھے۔ بتایا جا رہا ہے کہ دونوں ملزمان واردات کرتے وقت نشے کے عادی تھے۔

پولیس کا یہ بھی کہنا تھا کہ بچہ دونوں ملزمان کو جانتا تھا اور ان کی بچے کے گھر والوں سے کوئی دشمنی نہیں تھی۔ ایک ملزم نے ہفتے کی رات ساڑھے دس بجے کے قریب بچے کو بلایا جب وہ اپنے شیڈ میں جا رہا تھا۔

تفتیش کاروں کے مطابق دونوں ملزمان لڑکے کو اپنے کچن میں لے گئے اور اسے قتل کر دیا۔ اس معاملے میں مزید تفتیش جاری ہے۔ پولیس کے مطابق ایک ملزم نے بتایا کہ بھولے بابا اس کے سامنے آئے اور اس سے بچے کی قربانی دینے کو کہا تھا۔