الٰہ آباد ہائی کورٹ کی موجودہ عمارت کے سو برس مکمل ، مسلم ججوں نے رقم کی ہے ایک نئی تاریخ

اپنے بیباک اور تاریخی فیصلوں کے لئے مشہور الہ آباد ہائی کورٹ کی موجودہ عمارت کے سو برس پورے ہو گئے ہیں ۔ الہ آباد ہائی کورٹ کو ڈیڑھ سو برس پہلے قائم کیا گیا تھا وہیں ہائی کورٹ کی موجودہ عمارت کو سو برس مکمل ہو گئے ہیں ۔ الہ آباد ہائی کورٹ کی تاریخ مسلم وکلا کی تاریخ ہے ۔ اس ہائی کورٹ سے وابستہ مسلم ججوں نے ملک کے قانونی شعبہ میں ایک نئی تاریخ رقم کی ہے ۔

الہ آباد ہائی کورٹ کی قانونی خدمات شاندار رہی ہیں ۔ الہ آباد ہائی کورٹ کو یہ امتیاز بھی حاصل ہے کہ یہاں سب سے زیادہ مسلم ججوں نے اپنے قانونی فرائض انجام دئے ہیں ۔

الہ آباد ہائی کورٹ کے ڈیڑھ سو برس اور موجودہ عمارت کے سو برس مکمل ہونے پر آج بھی جسٹس محمود اور سر شاہ سلیمان کی غیر معمولی قانونی خدمات یہاں کی شاندار وارثت میں شمار کی جاتی ہیں ۔

گرچہ الہ آباد ہائی کورٹ کا قیام 1866 میں ہی عمل میں آ گیا تھا لیکن الہ آباد ہائی کورٹ کو موجودہ عمارت میں منتقل ہوئے ایک صدی کا عرصہ بیت گیا ہے۔

الہ آباد ہائی کورٹ کی تاریخ مسلم قانون دانوں کی تاریخ بھی ہے ۔

ہائی کورٹ کے پہلے ہندوستانی جج سرسید کے فرزند سید محمود تھے۔ اسی طرح ہائی کورٹ کے پہلے ہندوستانی چیف جسٹس سرشاہ سلیمان تھے ۔

اس کے علاوہ ہائی کورٹ سے وابستہ درجنوں ایسے مسلم قانون دانوں کے نام ہیں، جنہوں نے قانون اور سیاست کے میدان میں اپنی گہری چھاپ چھوڑی ہے ۔

الٰہ آباد ہائی کورٹ کی عمارت کے سو برس مکمل ہونے پر اس کو دلہن کی طرح سجایا گیا ۔

ہائی کورٹ عمارت کی صد سالہ تقریبات کا افتتاح سپریم کورٹ کے سینئر جج رنجن گو گوئی نے کیا ۔

افتتاحی اجلاس میں الہ آباد ہائی کورٹ کے چیف جسٹس ڈی بی بھوسلے سمیت ملک کے ممتاز قانون دانوں اور دا نشوروں نے شرکت کی ۔

اس موقع پر جسٹس رنجن گوگوئی نے الہ آباد ہائی کورٹ میں نو لاکھ سے بھی زیادہ کیسز زیر سماعت ہونے پر اپنی سخت تشویش کا اظہار کیا ۔ ان کا کہنا تھا کہ مقدمات کا بوجھ کم کرنے کے لئے کار گر قدم اٹھانے کی ضرورت ہے۔