الہ آباد : 14 سالہ محمد عکرمہ کا انوکھا کارنامہ ، 80 ہزار روپئے میں بنائی لکڑی کی کار

الہ آباد میں ایک کم سن مسلم لڑکے نے ایک انوکھا کارنامہ انجام دے کر ملک بھر کی توجہ اپنی طرف کھینچ لی ہے ۔ چودہ سالہ طالب علم محمد عکرمہ نے اپنی ہنر مندی سے ایک ایسا کار نامہ انجام دیا ہے ، جس کی ہر کوئی تعریف کرنے پر مجبور ہے ۔ محمد عکرمہ نے انتہائی کم لاگت میں لکڑی کی ایک ایسی کار بنائی ہے ، جو اس وقت سڑک پر دوڑ رہی ہے ۔

سب سے دلچسپ بات یہ کہ چودہ سال عمر ہونے کی وجہ سے عکرمہ ابھی خود اپنی کار کو نہیں چلا سکتے۔ اس کے لیے ابھی ان کو لرننگ لائسنس کے لیے دو سال اور پرماننٹ لائسنس کے لیے چار سال انتظار کرنا ہوگا۔ فی الحال ان کی کار کی اسٹیئرنگ ان کے والد نے ہی سنبھال رکھی ہے۔

محمد عکرمہ کی بنائی کار کوئی ونٹیج کار نہیں ہے ، بلکہ یہ معمولی لکڑیوں سے بنی ایک خاص کار ہے ، جس کو اسکو ٹر کے پرانے انجن سے چلایا گیا ہے۔ محمد عکرمہ نے لکڑی کی اس کار کا تجربہ جب سڑک پر کیا ، تو اس کو دیکھنے کے لئے لوگوں کی بھیڑ جمع ہو گئی۔

ایک غریب گھر سے تعلق رکھنے والے عکرمہ نے کچھ دن پہلے اسکول میں ایک چھوٹی کار کا ماڈل پیش کیا تھا ۔ اس کام کے لیے عکرمہ کی کافی حوصلہ افزائی کی گئی ۔ اس بعد عکرمہ نے ایک بڑی کار بنانے کا فیصلہ کیا اور صرف اسّی ہزار کی لاگت سے بنی لکڑی کی کار کو کامیابی کے ساتھ سڑک پر چلا کر دکھا دیا۔

عکرمہ کی ایجاد کردہ کار میں دو لوگ آرام سے بیٹھ سکتے ہیں۔ اس کےعلاوہ بہت کم لاگت میں اس طرح کی کاروں کو مزید بہتر طریقے سے بنایا جا سکتا ہے۔عکرمہ کے والد پیشے سے ایک کار پینٹر ہیں ۔ پہلے تو انہوں نےاس کام لئےعکرمہ کو منع کیا ، لیکن اس کی لگن اور شوق دیکھ کر انہوں نے بعد میں نہ صرف اس کی اجازت دی ، بلکہ اس کام میں اس کی حوصلہ افزائی بھی کی۔

کار پر قومی پرچم لگا کر عکرمہ جب سڑکوں پر نکلا ، تو ان کے اس کار نامے کو دیکھنے کے لئے بڑی تعداد میں لوگ جمع ہو گئے۔ لوگوں کا کہنا ہے اتنی کم عمر میں ایک بڑا کار نامہ انجام دینے والےعکرمہ کو حکومت کی طرف سے انعام ملنا چاہئے ۔

عکرمہ کی اس ایجاد پر لوگوں کی طرف سے ان کی کافی حوصلہ افزائی کی جا رہی ہے ۔ عکرمہ کا کہنا ہے کہ وہ مستقبل میں آٹو موبائل انجینئر بننا چاہتا ہے۔ مقامی لوگوں کا خیال ہے کہ عکرمہ کو اگر حکومت کی طرف سے امداد مل جائے ، تو اس کا خواب شرمندہ تعبیر ہو سکتا ہے ۔