حج 2018: دلی سے عازمین حج کا پہلا قافلہ سعودی عرب روانہ
ہندوستانی عازمین حج کا بیت اللہ کے لئے سفر آج سے شروع ہونے جا رہا ہے۔ پورے ملک سے آج تقریباَ 3000 لوگ حج کے لئے سعودی عرب روانہ ہوں گے۔
ہندوستانی عازمین حج کا بیت اللہ کے لئے سفر آج سے شروع ہو چکا ہے۔ پورے ملک سے آج تقریباَ 3000 لوگ حج کے لئے سعودی عرب روانہ ہو رہے ہیں۔ دلی کے اندراگاندھی انٹرنیشنل ایرپورٹ کے ٹرمنل دوم سے عازمین کا پہلا قافلہ سوئے حرم کے لئے روانہ ہو گیا ہے۔ روانگی سے قبل یہاں ایئر پورٹ پر ایک تقریب کا انتظام کیا گیا جس میں مرکزی وزیر برائے اقلیتی امور مختار عباس نقوی نے بطور خاص شرکت کی۔
اس موقع پر اقلیتی وزیر نے عازمین حج کو مبارکباد دیتے ہوئے ان سے ملک میں خوشحالی اور امن وامان کی فضا برقرار رہنے کے لئے خصوصی دعا کرنے کی اپیل کی۔ دلی سرکار کے مسلم وزیر عمران حسین تقریب ختم ہونے کے بعد ائیرپورٹ پہنچے اور انہوں نے عازمین کے تئیں اپنی نیک خواہشات ظاہر کیں۔
دہلی سے 1230 عازمین حج، سری نگر سے 800 عازمین حج، لکھنؤ سے 600 عازمین حج، گوہاٹی سے 256 عازمین حج اور گیا سے 150 عازمین حج سفر حج کیلئے روانہ ہو رہے ہیں۔
مرکزی حج کمیٹی کی طرف سے حج پر جانے والے عازمین کی روانگی کا سلسلہ 14 جولائی سے شروع ہوگیا ہے اور یہ سلسلہ 14 اگست تک جاری رہے گا۔
دلی سے آج تین پروازیں روانہ ہوں گی۔ پہلی فلائٹ 11:30 بجے ، دوسری فلائٹ شام 4 بجے اور تیسری فلائٹ رات 8 بجے روانہ ہو گی۔
واضح رہے کہ اس سال مرکزی حج کمیٹی سے ایک لاکھ 28 ہزار 7 سو 2 عازمین فریضہ حج ادا کریں گے۔ ائیرپورٹ پر موجود دلی حج کمیٹی کے چئیرمین حاجی محمد اشراق، مرکزی حج کمیٹی کے رکن عرفان احمد اور دلی حج کمیٹی کے رکن فیروز احمد نے حج کے تمام انتظامات کو مکمل کرنے کا دعویٰ کرتے ہوئے کہا ہے کہ ہم نے عازمین کا پوری طرح سے خیال رکھا ہے۔ ہماری کوشش ہے کہ عازمین حج کو کسی طرح کی کوئی پریشانی نہ ہو۔
