الہ آباد میں قومی کتاب میلہ سے اردو کی کتابیں ندارد، ایک بھی اردو کا اسٹال نہیں

الہ آباد میں چلنے والے دس روزہ قومی کتاب میلے سےاس مرتبہ اردو کی کتابیں ندارد ہیں۔ کتاب میلےمیں ایک بھی اردو پبلیشرنےشرکت نہیں کی۔ یہاں تک کے اردو کے فروغ کا کام کرنے والے دو بڑے سر کاری ادارے، یو پی اردو اکاڈمی اور قومی اردو کونسل ،نے بھی اپنے اسٹال نہیں لگائے ہیں۔ اردو کی کتابیں نہ ہونے سے اردو کے قارئین بھی کتاب میلے کی طرف رخ نہیں کر رہے ہیں ۔

اس مرتبہ کتاب میلے میں ملک بھر سے بچاس سے زائد پبلیشر شرکت کررہے ہے ہیں، لیکن اس پورے کتاب میلےمیں ایک بھی اردو کا اسٹال نہیں ہے۔

یہ پہلی مرتبہ ہوا ہے کہ الہ آباد کتاب میلے میں اردو کا ایک بھی ادارہ شامل نہیں ہوا ہے۔ اردوادب سےمتعلق یہاں جو کتابیں پیش کئی گئی ہیں وہ ہندی رسم الخط میں ہیں ۔

کتاب میلے میں اردو کی کتابیں نہ ہونے سے اردو داں طبقے میں مایوسی ہے ۔ اردو کے مقامی بک سیلر بھی اس صورت حال سے کافی ناراض ہیں۔

الہ آباد اردو زبان وادب کا اہم مرکز رہا ہے۔ یہاں لگنے والے کتاب میلوں میں اردو کےاسٹال لازمی طورسے ہوا کرتے تھے۔

دوسری جانب کتاب میلہ انتظامیہ کا کہنا ہے کہ اس نے کئی اردو اداروں کو اپنا اسٹال لگانے کی دعوت دی تھی ، لیکن کسی بھی ادارے نے اس کا معقول جواب نہیں دیا ۔