بی ایس پی کے سابق لیڈر سوامی پرساد موریہ بی جے پی میں شامل، دیکھیں تصویریں

بہوجن سماج پارٹی کے اعلی رہنماوں میں سے ایک اور اترپردیش اسمبلی میں اپوزیشن لیڈر رہ چکے مسٹر سوامی پرساد موریہ آج بی جے پی میں شامل ہوگئے۔ مسٹر موریہ نے بی ایس پی کے کئی سابق وزیروں اور سابق ممبران اسمبلی کے ساتھ سینکڑوں کی تعداد میں آئے اپنے حامیوں سے اپیل کی کہ وہ 2017میں بی جے پی کو زبردست اکثریت والی حکومت بنانے کی کوشش میں لگ جائیں۔

بی جے پی صدر امت شاہ اور نائب صدر اوم ماتھر کی موجودگی میں پارٹی کی اترپردیش یونٹ کے انچارج کیشو پرساد موریہ نے مسٹر موریہ کو انگ وستر پہنا کر پارٹی میں باضابطہ شامل کیا۔

پارٹی کے نائب صدر اور لکھنؤ کے میئر دنیش شرما، ممبر پارلیمنٹ شیو پرتاپ شکلا اور رویندر کشواہا ،پارٹی کے سکریٹری سری کانت شرما او ررامیشور چورسیا بھی پروگرام میں موجود تھے۔

اس موقع پر اترپردیش سے بی ایس پی کے کئی سابق وزیروں اور سابق ممبران اسمبلی سمیت لگ بھگ تین ہزار کارکنان موجود تھے۔

اس موقع پر مسٹر سوامی پرساد موریہ نے کہا کہ ملک میں دلت محروم غریب طبقات کو سماج میں اوپر لاکر اقتدارمیں تناسبی شراکت کو یقینی بنانے کے نظریہ پر کانسی رام نے بابا صاحب امبیڈکر کے اصولوں کی بنیاد پر بی ایس پی بنائی تھی لیکن اب وہاں کانشی رام کے نظریات کا قتل ہورہا ہے اور بی ایس پی ایک صنعتی گھرانہ بن گیا ہے۔

پارٹی کے ٹکٹوں کو فروخت کرکے جمہوریت کا قتل کیا جارہا ہے۔

انہوں نے کہا کہ اگر 2012 میں ٹکٹوں کو فروخت نہیں کیا گیا ہوتا تو اترپردیش میں دوبارہ بی ایس پی کی حکومت بنتی۔

انہوں نے کہا کہ ان حالات میں بی جے پی نے نیا راستہ دکھایا ہے۔ سب کو ساتھ لے کر ملک کو خوشحال بنانے کا کام کیا جارہا ہے دلتوں کو پسماندہ طبقات کو احترام دے کر اصل دھار ے سے جوڑا جارہا ہے۔

ترقی کے ساتھ برابری کا پیغام دینے میں بی جے پی ، بی ایس پی سے بہت آگے نکل گئی ہے۔

وزیر اعظم مودی کے گذشتہ چند دنوں کے بیانات کا ذکر کرتے ہوئے انہوں نے کہا کہ کچھ فرقہ پرست عناصر سماج کو توڑنے کی کوشش کررہے ہیں ۔

مسٹر مودی نے اس درد کو محسوس کرکے بالکل صحیح بیان دیا ہے ۔