UP Election 2022: امت شاہ کی کیرانہ میں ڈور ٹو ڈور مہم ، کہا : نقل مکانی کرانے والے اب نقل مکانی کرگئے

شاملی : اترپردیش اسمبلی انتخابات کو لے کر بی جے پی نے تشہیری مہم تیز کردی ہے ۔ اس درمیان مرکزی وزیر داخلہ امت شاہ شاملی کے کیرالہ میں ڈور ٹو ڈور مہم کرتے نظر آئے ۔ اس دوران لوگوں نے ان کا پھول مالا پہنا کرخیر مقدم کیا ۔

امت شاہ نے خراب موسم کے باوجود کیرانہ اسمبلی سیٹ سے بی جے پی امیدوار مرگانکا سنگھ کے لئے رائے دہندگان کے گھر گھر پہنچ کر ووٹ مانگے۔اس دوران امت شاہ نے بی جے پی حکومت کے ذریعہ پانچ سالوں میں کئے گئے ترقیاتی کاموں کا ذکر کرنے والے پرچے بھی عوام میں تقسیم کئے۔

انہوں نے بی جے پی کارکنوں سے الیکشن میں پارٹی کی جیت کو یقینی بنانے کے لئے دل و جان سے محنت کرنے کی اپیل کی۔ اس سے پہلے کیرانہ پہنچنے پر شاہ کا ایم پی پردیپ چودھری، وزیر گنا سریش رانا اور بی جے پی امیدوار مرگانکا سنگھ نے استقبال کیا۔ ہیلی پیڈ سے شاہ سیدھے عوامی رابطہ مہم کے لئے روانہ ہوگئے۔

شاہ کے گھر گھر عوامی رابطہ مہم کے دوران پر جوش کارکنوں نے جئے شری رام کے نعرے بھی لگائے۔ شاہ نے کیرانہ کے بازار جوئیوا کنواں علاقے کے کاروباریوں سے بھی ملاقات کی۔ بعد اذاں میڈیا نمائندوں سے خطاب کرتے ہوئے انہوں نے کہا کہ یوگی حکومت میں نظم ونسق کافی چشت و درست ہونے کا دعوی کیا۔

امت شاہ نے کہا کہ وزیر اعظم مودی کی سبھی اسکیموں کو وزیر اعلی یوگی نے زمینی سطح تک لاگو کیا ہے ۔ یہ وہی کیرانہ ہے ، جہاں سے پہلے لوگ نقل مکانی کررہے تھے ۔ انہوں نے کہا کہ جن لوگوں نے انہیں نقل مکانی کروایا ، وہ خود نقل مکانی کرچکے ہیں ۔

خیال رہے کہ اس سے قبل 08 نومبر کو وزیر اعلی یوگی آدتیہ ناتھ نے بھی کیرانہ کا دورہ کیا تھا۔ جہاں پر انہوں نے مبینہ طور سے نقل مکانے کرکے دوبارہ واپس لوٹے کاروباریوں سے ملاقات کی تھی۔ الیکشن سے عین قبل وزیر داخلہ نے کیرانہ آنے پر بی جے پی کے لئے نقل مکانے کو انتخابی ایجنڈا بنانے کی کوشش کی ہے۔

عوامی رابطہ سازی مہم کے بعد امت شاہ نے میرٹھ میں کارکنوں کے ساتھ بیٹھ کر انتخابی تیاریوں کا جائزہ لیا۔ اس دوران انہوں نے پارٹی عہدیداروں کو جیت کے منتر بھی دئیے۔