اترپردیش میں لاک ڈاون کے دوران اوقاف پر غیرقانونی قبضے کے معاملات میں تیزی سے اضافہ

یوپی میں لاک ڈاؤن کے دوران اوقاف کی جائیداد پر غیرقانونی قبضے کے واقعات میں تیزی سے اضافہ ہوا ہے ۔ ریاست میں اوقاف کے تحفظ کے لئے کام کرنے والی تنظیم ’’ یو پی قبرستان انتظامیہ کمیٹی ‘‘ نے یہ انکشاف کیا ہے ۔ قبرستان انتظامیہ کمیٹی نے اس کے لئے شیعہ اور سنی وقف بورڈوں کوبراہ راست ذمہ دار ٹھرایا ہے ۔ تنظیم کا کہنا ہے کہ دونوں وقف بورڈ اوقاف پرغیر قانونی قبضے کے معاملے میں جان بوچھ کرخاموشی اختیار کئے ہوئے ہیں ۔

تنظیم کے صدر جاوید محمد کا کہنا ہے کہ یو پی میں اوقاف کو غیر قانونی طریقے سے فروخت کرنے کا سلسلسہ گزشتہ کئی برسوں سے جاری ہے ۔ لیکن لاک ڈاؤن کے دوران ایسے معاملات میں تیزی سے اضافہ ہواہے ۔ جاوید محمد کا کہنا ہے کہ اوقاف کے تحفظ کے معاملہ میں ریاستی حکومت بالکل سنجیدہ نہیں دکھائی دے رہی ۔

دریں اثناء الہ آباد ہائی کورٹ کے سینئرایڈو کیٹ اوروقف قوانین کے ماہر سید فرمان احمد نقوی نے بھی اس طرح کے معاملات میں اضافہ ہونے کی تصدیق کی ہے ۔ ان کا کہنا ہے کہ لاک ڈاؤن کے دوران زمین مافیا اور شر پسند عناصر نے مل کر موقع کا فائدہ اٹھایا ہے ۔ سید فرمان احمد نقوی نے شہر کی چھوٹی کربلا پر ہونے والے غیر قانونی قبضے کو لیکرالہ آباد زون کے انسپکٹر جنرل آف پولیس کو ذاتی طور سے درخواست لکھی ہے ۔ انہوں نے اپنی درخواست میں وقف جائیداد پر ہونے والے غیر قانونی قبضے کی تفصیل بھی دی ہے ۔

ادھر آئی جی زون کی طرف سے اس معاملہ میں مقامی پولیس کو مناسب کارروائی کرنے کا حکم بھی جاری کیا گیا ہے۔ لیکن پولیس نے ابھی تک غیر قانونی قبضہ کرنے والے عناصر کے خلاف کوئی کارروائی نہیں کی ہے ۔

قبرستان انتطامیہ کمیٹی کا کہنا ہے کہ ریاست کے دیگر اضلاع سے بھی اوقاف پرغیر قانونی قبضے کی اطلاعات موصول ہو رہی ہیں ۔ لیکن وقف بورڈ اور نہ ہی مقامی پولیس ان تجاوزات کے خلاف کوئی قدم اٹھا رہی ہے ۔ قبرستان انتظامیہ کمیٹی کا کہنا ہے کہ جس طرح سے اوقاف کی جائیداد میں خرد برد کی جارہی ہے، اس صورت حال مزید سنگین ہو گئی ہے ۔( تصاویر اور رپورٹ : مشتاق عامر ) ۔