Weather Update: برفیلی ہواوں نے بڑھائی دلی کی سردی، 5 ڈگری سیلسیس تک پہنچا درجہ حرارت

مغربی ہمالیہ سے چلی برفیلی ہواوں کی وجہ سے دلی میں کڑاکے کی ٹھنڈ پڑ رہی ہے۔ محکمہ موسمیات کے مطابق، ہفتہ کو اور بھی ٹھنڈا دن ہو سکتا ہے۔ دلی میں جمعرات کو جہاں زیادہ سے زیادہ درجہ حرارت معمول سے 7 ڈگری نیچے 15.2 ڈگری سلیسیس درج کیا گیا اور یہ اس موسم کا سب سے کم درجہ حرارت ہے۔

ہندستانی محکمہ موسمیات کے مطابق، صفدر جنگ نے کم از کم درجہ حرارت 4.4 ڈگری سیلسیس درج کیا۔ وہیں پالم اسٹیشن نے کم ازکم درجہ حرارت 3.4 ڈگری سیلسیس درج کیا۔

محکمہ موسمیات کے مطابق، ٹھنڈا دن اسے کہتے ہیں جب کم ازکم درجہ حرارت 10 ڈگری سیلسیس سے کم ہوتا ہے اور زیادہ سے زیادہ درجہ حرارت معمول سے کم سے کم 4.4 ڈگری سلیسیس سے نیچے ہوتا ہے۔

محکمہ موسمیات نے بتایا کہ ہفتہ کو دلی میں ' شیت لہر' چلنے کا پیشگی اندازہ ہے اور اس کے پیر تک جاری رہنے کا امکان ہے۔

دلی میں جمعرات کو ہواوں کی بھی رفتار تیز رہی۔ موصولہ اطلاعات کے مطابق، قومی دارالحکومت میں بیتے 24 گھنٹوں میں 18 کلو میٹر فی گھنٹے کی رفتار سے ہوا چلی جس کے پیش نظر درجہ حرارت میں اور گراوٹ درج کی گئی۔ مانا جا رہا ہے کہ جمعہ کو بھی صورت حال ایسی ہی رہے گی۔