انوکھی پہل : بنگلورو کے محمد فاروق نے بے سہارا سن رسیدہ افراد کو سہارا دینے کا اٹھایا بیڑا

اسلام میں والدین کی خدمت کو بڑی اہمیت دی گئی ہے ـ ماں کے قدموں تلے جنت اور باپ کو جنت کا دروازہ کہا گیا ہے ، لیکن حالات حاضرہ میں والدین اور عمر دراز افراد کے بے سہارا ہونے کے واقعات بڑھ رہے ہیں ـ اس سلسلہ میں ایک انوکھی پہل بنگلور کے محمد فاروق نے ہے ۔ زندگی کے آخری پڑاؤ میں راستہ پر آنے والے ان سن رسیدہ افراد کو بنگلورو کے محمد فاروق نے سہارا دینے کا بیڑا اٹھایا ہے ـ

یہ ایک کڑوا سچ ہے کہ آج کے دور میں بیشتر والدین اپنی زندگی کے آخری پڑاؤ میں بے سہارا ہورہے ہیں ـ بہت سے ایسے بزرگ ہیں جو شادی نہ کرنے کی وجہ سے بڑھاپے میں لاوارث ہوجاتے ہیں اور کچھ ایسے والدین ہیں جنہیں بچے اپنے ساتھ رکھنا نہیں چاہتےہیں۔

ایسے میں والدین آخر جائیں تو جائیں کہاں ـ یہ ایک چبھتا سوال ہمارے سامنے ہے ـ اس کو سنجیدگی سے لیتے ہوئے بنگلورو کے محمد فاروق نامی شخص نے اپنی ذاتی زمین پر ایک آشیانہ بنایا ہے۔

اس آشیانہ میں ایسے بے سہارا سن رسیدہ افراد کو سہارا دیا جارہا ہے ـ یہاں موجود بزرگ ایسی حالت میں ہیں کہ وہ ٹھیک سے بات بھی نہیں کرپاتے ہیں ۔ یہاں ہر شخص کی الگ الگ دکھ بھری کہانی ہے ، جے سن کر آنکھیں نم ہو جاتی ہیں

شہر کے فریزر ٹاؤن کے رہنے والے فاروق کے والد کے چند دوست بے سہارا ہوگئے تھےـ

فاروق نے ان لوگوں کو اولڈ ایج ہوم میں داخل کرنے کی کوشش کی ، لیکن بنگلورو میں ایک بھی ایسا مسلم ادارہ نہیں ملا جہاں پر ان بزرگوں کو پناہ مل سکے ـ

اسی وجہ سے بنگلورو کے دیونہلی میں موجود اپنی ذاتی زمین پر انہوں نے ان بے سہارا بزرگوں کیلئے آشیانہ کی بنیاد ڈالی ـ دیکھتے ہی دیکھتے ایسے بے سہارا لوگوں کی تعداد بڑھنے لگی

اس وقت آشیانہ میں 36 سن رسیدہ افراد موجود ہیں ، جنہیں قیام و طعام کے علاوہ علاج اور اسلامی تہذیب سے زندگی گذارنے کا آخری موقع فراہم کیا جارہا ہے ـ

الامان ایجوکیشنل ویلفیر ٹرسٹ کے زیر اہتمام چلائے جارہے اس آشیانے میں مسجد کی بھی تعمیر کرائی گئی ہے ، جہاں پانچ وقت نماز اداکی جاتی ہے ـ

یہاں کے ملازمین بھی خدمت کا جذبہ رکھتے ہیں اور فاروق کا کہنا ہے کہ انہیں بزرگوں کی خدمت کرکے روحانی سکون ملتا ہے۔

فاروق احمد اپنے ذاتی اخراجات کے ساتھ ساتھ قریبی دوستوں کے تعاون سے آشیانہ چلارہے ہیں ـ

سال 2011 میں شروع کئے گئے آشیانہ میں 13سے زائد لوگوں نے زندگی کی آخری سانس لی ہے ـ

فاروق کی طرح ہی ملک کے ہر کونے میں آج بزرگوں کو مدد فراہم کرنے کی ضرورت ہے اور بچے بھی اپنے والدین کی اہمیت کو سمجھیں ورنہ ان بچوں کا بھی وہی حشر ہوگا جو ان کے والدین کا ہورہا ہے۔ رپورٹ : شاہد قاضی ۔