وشاکھاپٹنم: گیس لیک کے بعد سڑکوں پر بیہوش دکھے لوگ، بچوں سے بھر گئے اسپتال

آندھرا پردیش کے وشاکھاپٹنم کے کمیکل پلانٹ سے گیس کے اخراج کے سبب تقریبا ایک 8سالہ بچے سمیت سات لوگوں کی موت ہو گئی اور تقریبا تین سو لوگوں کو اسپتال میں بھرتی کرانا پڑا۔ وہیں، پانچ ہزار سے زیادہ لوگ بیمار ہیں۔

ذرائع نے کہا کہ ان تمام کی موت بندرگاہی شہر میں واقع کنگ جارج اسپتال میں علاج کے دوران ہوئی۔ ایمبولنس اور فائر انجنس کے ساتھ ساتھ پولیس کمیکل پلانٹ پہنچ گئی ہے۔

ابتدائی اطلاعات کے مطابق اس پلانٹ کی گیس تین کیلو میٹر کے احاطہ میں پھیل گئی جس سے تقریبا پانچ مواضعات متاثر ہوگئے۔سینکڑوں افراد اس زہریلی گیس کی وجہ سے بے ہوش ہوگئے۔ بتایاجاتا ہے کہ اس واقعہ کے سبب پانچ مواضعات بشمول آرآر وینکٹاپورم،پداپورم،بی سی کالونوی اور کمپارالاپالم متاثر ہوئے۔کمیکل گیس پلانٹ کے قریب رہنے والے افراد نے آنکھیں جلنے اور سانس لینے میں دشواری کی شکایت کی۔

ٹی وی چینلوں پر نشر فوٹیج میں لوگ سڑکوں پر بیہوش پڑے نظر آ رہے ہیں۔ این ڈی آر ایف اور ایس ڈی آر ایف کی ٹیمیں اس علاقے میں تعینات کر دی گئی ہیں اور راحتی کام جاری ہے۔

گریٹر وشاکھاپٹنم میونسپل کارپوریشن نے ٹوئیٹ کرتے ہوئے کہا کہ گوپال پٹنم کے ایل جی پالی مرس میں گیس کے اخراج کا واقعہ پیش آیا۔شہریوں سے درخواست ہے کہ وہ ان مقامات پر نہ جائیں اور اپنے مکانات سے احتیاطی اقدام کے طورپر نہ نکلیں۔ماسک پہنے ہوئے لوگ لوگوں کو منتقل کرتے ہوئے نظر آرہے ہیں جو سانس لینے میں دشواری محسوس کررہے ہیں۔