Bakra Eid 2021 : مالک کی ڈیمانڈ ایک کروڑ روپے ، 51 لاکھ دینے کیلئے خریدار تیار، جانئے آخر اس بکرے میں کیا ہے خاص

بلڈھانہ : قربانی کیلئے ایک تندرست اور صحت مند جانور کی ضرورت ہوتی ہے ۔ بقر عید کے موقع پر خوبصورت اور صحت مند بکرے کے لئے لوگ اچھے دام دینے کے لئے تیار رہتے ہیں ۔ مہاراشٹر کے بلڈھانہ ضلع میں ایک ٹائیگر نام کا بکرا ان دنوں موضوع بحث بنا ہوا ہے اور دور دور سے لوگ اس بکرے کو دیکھنے کیلئے آرہے ہیں ۔ آپ سوچ رہے ہوں گے کہ آخر ایسا کیا ہے اس بکرے میں ۔ تو آئیے آپ کی الجھن دور کر دیتے ہیں ۔ (تصویر اور رپورٹ : وسیم انصاری)

در حقیقت جب ٹائیگر نامی اس بکرے کو اس کا مالک بیچنے بازار لے گیا تو لوگ اس بکرے کو خریدنے کے لئے 36 لاکھ روپے تک کی بولی لگادی اور کسی بھی صورت میں لوگ یہ بکرا خریدنا چاہتے ہیں ۔

الجھن میں مبتلا ٹائیگر کے مالک سمادھن چوہان اسے واپس لے کر گھر آگئے ۔ ان کا کہنا ہے کہ مجھے اس بکرے کو ایک کروڑ روپے میں بیچنا ہے۔

فی الحال معلومات کے مطابق لوگ اس بکرے کے لئے 51 لاکھ روپے تک دینے کیلئے تیار ہیں ۔

آپ یہ ضرور سوچ رہے ہوں گے کہ آخرکیا وجہ ہے کہ لوگ اس بکرے کے لاکھوں روپے دے رہے ہیں ، تو بتادیں کہ ٹائیگر لمبا چوڑا قد اور صحت مند بکرا ہے ، جس کو پکڑنے میں کم از کم دو لوگ لگتے ہیں ۔

اس کے علاوہ سب سے بڑی بات یہ ہے کہ اس کے جسم پر پیدائشی اللہ لکھا ہوا ہے ، جس کی وجہ سے ہر ایک شخص اس کوخریدنا چاہتا ہے۔

یاد رہے کہ بقرعید کے موقع پر قربانی کے لئے بکرا خریدنے اور بیچنے کا سلسلہ زوروں پر ہے ۔

ندیم شیخ کے مطابق بقر عید کے دوران وہ بکرا جس پر اللہ کا لکھا ہے یا چاند بنا ہوتا ہے ، اُس جانور کی مانگ قربانی کے لئے زیادہ ہوتی ہے اور اس کی اچھی قیمت بازار میں مل جاتی ہے ۔