گجرات سے 300 عازمین حج کا پہلا دستہ مقدس سفر پرروانہ

اقلیتی امور کے مرکزی وزیر مملکت آزادانہ چارج اور پارلیمانی امور کے مرکزی وزیر مملکت مختار عباس نقوی نے سردار ولبھ بھائی پٹیل بین الاقوامی ائر پورٹ سے گجرات کے عازمین حج کے پہلے دستہ کوروانہ کیا۔ اس موقع پر مسٹر نقوی نے کہا کہ ہر مسلم کی یہ خواہش ہوتی ہے کہ وہ اپنی زندگی میں کم سے کم ایک بار سفر حج پر جائے۔ مسٹر نقوی نے تمنا کی کہ اس بار کے فریضہ حج کی ادائیگی سے ہمارے ملک اور پوری دنیا میں امن وخوشحالی اور ہم آہنگی کے پیغام کو تقویت ملے۔

اس موقع پر گجرات کے شہری ہوابازی کے وزیر بابو بھائی کو کھیریا ، خواتین اور اطفال کی بہبود کی وزیر نرملا واد ھوانی، گجرات حج کمیٹی کے چیئرمین محمد علی قادری اور دیگر سرکردہ شخصیات موجود تھیں۔

گجرات سے پہلے دستہ میں مجموعی طور پر 300 عازمین حج آج صبح سعودی عرب کے شہر جدہ کے لئے روانہ ہوئے۔ گجرات سے تقریبا 7500 افراد فریضہ حج کے لئے جائیں گے۔

2016 کے سفر حج کے لئے پورے ہندوستان میں حج کمیٹی کی طرف سے تقریبا ایک لاکھ بیس عازمین حج کےلئے 21 مقامات پر سہولیات فراہم کی گئی ہیں۔ اس کے علاوہ 36 ہزارعازمین حج پرائیویٹ ٹور آپریٹر کے توسط سے سعودی عرب جائیں گے۔

مسٹر نقوی نے کہا کہ ہندوستان میں 21 مراکز پر اور سعودی عرب میں بھی عازمین حج کی سہولیات اور تحفظ کے لئے مناسب بندوبست کئے گئے ہیں۔ مسٹر نقوی نے کہا کہ وہ خود تمام بندوبست کی نگرانی کررہے ہیں۔