نوٹ بندی کا اثر : این سی پی یو ایل کے 20 ویں کل ہند کتاب میلے میں پے ٹی ایم اور سویپ مشین کا انتظام

مہاراشٹر کے بھیونڈی میں منعقد ہونے والے قومی کونسل برائے فروغ اردو زبان کے بیسویں کل ہند کتاب میلے کو کامیاب بنانے کے لئے کونسل پوری طرح کوشاں ہے۔ کونسل نے کتاب میلے کونوٹ بندی کے اثر سے محفوظ رکھنے کے لئےکتب فروشوں اور پبلیشروں کوخصوصی طور پرای پیمنٹ کی سہولیات فراہم کروائی ہیں ۔

کونسل کے سربراہ پروفیسر ارتضی کریم کا کہنا ہے کہ میلے کے زیادہ تراسٹالوں کے لئے پے ٹی ایم اور سویپ مشین کا انتظام کیا گیا ہے ۔تا کہ خریداروں کو سہولیات فراہم کی جاسکیں۔

قومی کونسل برائے فروغ اردو زبان بھیونڈی میں منعقد ہونے والے کل ہند کتاب میلے سے بہت پر امید ہے، کیونکہ اہلیان اردو میں کافی جوش و خروش پایا جارہا ہے۔

تاہم نوٹ بندی سے پیدا ہونے والے منفی حالات کو مات دینےکے لیے قومی کونسل اورمقامی ذمہ داران کافی کوششیں کررہے ہیں ۔ امید ہے کہ اردو کتاب میلے میں ایک کروڑ سے زیادہ مالیت کی کتابیں فروخت ہوگی۔

سترہ دسمبر سے 25 دسمبر تک منعقد ہونے والے اس میلے کا افتتاح مرکزی وزیر برائے فروغ حقوق انسانی وسائل پرکاش جاؤڑیکرکے ہاتھوں عمل میں آیا۔

واضح رہے کہ بھیونڈی ریاست مہاراشٹر میں اردو زبان و ادب کا گہوارہ مانا جاتا ہے۔

قومی کونسل بھیونڈی کے تعلیمی ادارے کوکن مسلم ایجوکیشن سوسائٹی کے اشتراک سے کل ہند کتاب میلہ منعقد کررہا ہے۔

میلے میں بھیونڈی کے علاوہ ممبرا ۔ میرا روڑ اور ارد گرد کی اردو آبادی بھی کافی دلچسپی لے رہی ہے۔

اردواسکولوں تک پہنچ کر طلبہ و طالبات میں کتابوں کی خریداری سے متعلق بیداری بھی پیدا کی جارہی ہے۔

قومی کونسل کے ڈائریکٹر ارتضی کریم نے بھیونڈی میں صحافیوں کے ہمراہ منعقد میٹنگ میں کہا کہ این سی پی یوایل کے اردو کتاب میلے کا اہم مقصد اردو قارئین تک اردو کتابوں کو پہنچانا ہے۔

میلے میں اردو ادب زبان اور اردو تہذیب کے فروغ کیلئے مختلف پروگراموں کا انعقاد کیا جارہا ہے۔ اردو کے مسائل اور ان کے حل پر گفتگو کرنے کے لیے سیمینار اور سمپوزیم منعقد کئے جارہے ہیں ۔

علاوہ ازیں اردو اسکولوں کے طلبہ و طالبات میں زبان و ادب سے دلچسپی پیدا کرنے کے لیے بیت بازی اور تقرری مقابلوں کا انعقاد بھی کیا جارہا ہے۔

اہل بھیونڈی کی اردو کتاب میلے کے متعلق دلچسپی دیکھتے ہوئے ارتضی کریم کو اس بات کا پختہ یقین ہے کہ بھیونڈی میں منعقد ہونے والا اردو کتاب میلہ گزشتہ میلوں کے تمام ریکارڈتوڑ دے گا۔

بھیونڈی میں منعقد ہونے والے اردو کتاب میلے میں 120 سے زیادہ اسٹال لگائے گئے ہیں ۔

ان میں ملک بھر کے 50 سے زیادہ کتب فروش اور پبلیشرشامل ہیں ۔

کتاب میلے میں ادب کے علاوہ خواتین کی دلچسپی سے متعلق جدید علوم اور ٹکنالوجی سے متعلق کتابوں کو بھی شامل کیا گیا ہے۔

مانا جارہا ہے کہ یہ کتا ب میلہ دیگر کتاب میلوں سے منفرد ہوگا ۔