ممبرا کے عید بازار میں فلمی لباسوں کی دھوم، رئیس کی پٹھانی تو مستانی کے شرارے کا جلوہ

عید کا دن جیسے جیسے قریب آرہا ہے ، ویسے ویسے بازاروں میں خریداروں کی بھیڑ بڑھتی جارہی ہے ۔ مسلم اکثریتی شہر ممبرا میں گلاب پارک مارکیٹ عید بازار کے لئے کافی مشہور ہے ۔یہاں صرف ممبرا کوسہ کے ہی نہیں ،بلکہ کلیان، تھانے، تلوجہ ، پنویل و مضافات کے لوگ بھی خریداری کے لئے آتے ہیں ۔ یہاں مردانہ و زنانہ لباس ، ٹوپیاں اور بچوں کی پسند کے کپڑے معقول داموں میں مل جاتے ہیں ۔

سال رواں بازار میں عید اسپیشل میں مردوں میں شاہ رخ خان کی فلم رئیس کے پٹھانی سوٹ نے دھوم مچا رکھی ہے ۔

ہر نوجوان کی پہلی پسند رئیس پٹھانی سوٹ ہے ۔

وہیں خواتین بھی پیچھے نہیں ہیں ۔

اگرچہ مردوں میں رئیس نے دھوم مچائی ہے تو خواتین میں باجی راؤ مستانی کے شرارے کا جلوہ ہے ۔

خوب گھیروالے یہ شرارے خواتین کی پہلی پسند بنے ہوئے ہیں ۔

بازار میں مردوں کی بہ نسبت خواتین صارفین زیادہ ہیں ۔

کہتے ہیں عید بچوں اور عورتوں کی زیادہ ہے ۔

مرد حضرات تو پٹھانی ، ٹوپی اور جوتے لے کر فارغ ہوجاتے ہیں ، لیکن خواتین مہندی او ر چوڑیاں جب تک نہ خریدیں ، گویا ان کی شاپنگ ادھوری رہتی ہے ۔

عید بازار میں اس مرتبہ جئے پور کےکنگن کی فروخت زیادہ ہے ۔

اس کے علاوہ میٹل کی چوڑیاں بھی خواتین کی پسند بنتی جارہی ہیں ۔

اس طرح کل ملا کر ایک طرف نوٹ بندی تو دوسری جانب مہنگائی کا رونا ہر کوئی رو رہا ہے ، لیکن عید بازار کی رونق میں کمی نہیں ہے ۔

صارفین کی بھیڑہر سال کی طرح سال رواں بھی بازاروں میں خریداری میں مصروف ہے ۔