کون ہیں ارپتا مکھرجی، جن کے گھر سے ملے 20 کروڑ روپئے؟ ممتا بنرجی کے وزیر سے کیا ہے رشتہ؟

 ارپتا مکھرجی اداکارہ اور ماڈل ہیں۔ انہوں نے بنگالی کے ساتھ ساتھ اڑیا اور تمل فلموں میں بھی کام کیا ہے۔ ارپتا نے اپنے فلمی کیریئر کو کافی کم وقت دیا اور جتنے بھی رول کئے، ان میں سے بیشتر سائڈ رول تھے۔

 ارپتا مکھرجی بنگلہ فلموں کے سپر اسٹار پروسین جیت کے ساتھ بھی کچھ فلموں میں کام کرچکی ہیں۔ ارپتا مکھرجی 2008 میں ریلیز ہوئی بالی ووڈ فلم پارٹنر میں بھی کام کرچکی ہیں۔

مرکزی جانچ ایجنسی کے مطابق ٹیچرس بھرتی گھوٹالے میں جانچ کے دوران ارپتا مکھرجی کے ملوث ہونے کی بات سامنے آئی۔ دعویٰ کیا جا رہا ہے کہ وہ ریاستی حکومت کے وزیر پارتھ چٹرجی کی قریبی ہیں۔

 آپ کو بتادیں کہ ٹی ایم سی کے قد آور اور سینئر لیڈر پارتھ چٹرجی جنوبی کولکاتا میں مقبول درگا پوجا کمیٹی نٹکلا ادین کا انعقاد کرتے ہیں۔ دعویٰ کیا جا رہا ہے کہ ارپتا مکھرجی درگا پوجا کمیٹی کے ذریعہ سے ہی پارتھ چٹرجی کے رابطے میں آئی تھیں۔

اتنا ہی نہیں ارپتا مکھرجی 2019 اور 2020 میں نٹکلا ادین سنگھ کے ذریعہ منعقدہ درگا پوجا تقریب کا ایک اہم چہرہ بھی رہ چکی ہیں۔

چھاپہ ماری کے دوران ارپتا مکھرجی کے گھر سے کروڑوں روپئے کی نقدی کے علاوہ 20 قیمتی موبائل فون، سونا اور زمین کے دستاویز ملے ہیں۔

میڈیا رپورٹ میں ارپتا مکھرجی کو وزیر پارتھ چٹرجی کی قانونی مشیر بتایا جا رہا ہے۔ ای ڈی نے ان سے پوچھ گچھ کرنے کے بعد انہیں گرفتار کرلیا۔