صرف 14 میچ کھیل کر 110 سے نمبر 3 بلے باز بنا یہ کھلاڑی، اب خطرے میں اسٹیو اسمتھ کی جگہ

آسٹریلیائی بلے باز مارنس لابوشین آئی سی سی ٹسٹ رینکنگ میں نمبر تین پر پہنچ گئے ہیں۔ ان سے آگے اب صرف ہندوستانی کرکٹ ٹیم کے کپتان وراٹ کوہلی اور آسٹریلیائی عظیم بلے باز اسٹیو اسمتھ ہی ہیں۔

ایک سال پہلے تک وراٹ کوہلی اور اسٹیو اسمتھ کرکٹ کے میدان میں صرف ان دو بلے بازوں کی دھمک سنائی دیتی تھی، لیکن اب ان دو کھلاڑیوں کو ٹکر دینے کے لئے ایک اور کھلاڑی آگیا ہے۔ بات ہورہی ہے آسٹریلیا ئی بلے باز مارنس لابوشین (Marnus Labuschagne) کی۔ جو کہ آئی سی سی کی ٹسٹ رینکنگ میں 3 نمبر پر پہنچ گئے ہیں۔

تازہ آئی سی سی ٹسٹ رینکنگ میں ایک مقام کی چھلانگ لگا کر مارنس لابوشین 827 ریٹنگ پوائنٹ کے ساتھ تیسرے نمبر پر پہنچ گئے۔ لابوشین نے کین ولیمسن کو پیچھے چھوڑ دیا، جن کے 814 پوائنٹ ہیں۔ اب مارنس لابوشین سے آگے اسٹیو اسمتھ اور وراٹ کوہلی ہیں۔

آج سے ایک سال پہلے تک لابوشین کو ایک اوسط بلے باز مانا جاتا تھا۔ آسٹریلیا کی ٹسٹ ٹیم میں وہ بطور لیگ اسپنر شامل ہوئے تھے۔ لیکن دائیں ہاتھ کے اس بلے باز نے اپنی صلاحیت میدان پر دکھائی۔ غضب کی بات یہ ہے کہ 8 جنوری 2019 کو مارنس لابوشین کی ٹسٹ رینکنگ 110 تھی۔ اب ٹھیک ایک سال بعد 8 جنوری 2020 کو لا بو شین نمبر 3 پر پہنچ گئے ہیں۔ گزشتہ ایک سال میں لابوشین نے 107 مقام کی ریکارڈ چھلانگ لگائی ہے۔

5ٹسٹ کھیلنے کے بعد لابوشین کی رینکنگ 95 تھی۔ اس کے بعد انہیں زخمی اسٹیو اسمتھ کی جگہ پلیئنگ الیون میں جگہ ملی اورپھر اس بلے باز نے کبھی پیچھے مڑ کرنہیں دیکھا۔ چھٹے ٹسٹ میں لابوشین کی رینکنگ 82 ہوگئی۔ 7ویں ٹسٹ کے بعد 35 ویں نمبر پر پہنچ گئے۔ 10 ٹسٹ کھیلنے کے بعد لابوشین نے 14 ویں مقام پر قبضہ کرلیا۔ 11 واں ٹسٹ کھیلنے کے بعد لابوشین نے ٹاپ 10 میں انٹری کرتے ہوئے 8 ویں نمبر پرخود کو قابض کیا۔ 12 ویں ٹسٹ کے بعد لابوشین 5 ویں، 13 ویں ٹسٹ کے بعد چتھے اور 14 ویں ٹسٹ کے بعد لابویشن تیسرے نمبر پر پہنچ گئے۔