ورلڈ کپ کے بعد پاکستان کے اس بڑے کھلاڑی سمیت یہ پانچ اسٹار کرکٹرس ون ڈے میں نہیں آئیں گے نظر

عالمی کپ -2019 کے ساتھ پانچ اسٹارکرکٹرز کے ونڈے کریئر کا سورج بھی غروب ہوگا ۔ یہ اسٹارز کرس گیل ، شعیب ملک، ڈیل اسٹین، جے پال ڈومنی اور عمران طاہر ہیں ، جو آخری بار ایکشن میں نظر آئیں گے۔ طویل ونڈے کریئرکے بعد رٹائرمنٹ کا فیصلہ کرنے والے یہ پانچ کرکٹرز و عالمی کپ کے بعد اس فارمیٹ کو خیرباد کہہ دیں گے ۔

پاکستان کیلئے 282 ایک روزہ میچز میں 7481 رنز بنانے والے پاکستان کے پانچویں کامیاب ترین بلے باز شعیب ملک نے آف اسپن بولنگ کا جادو جگاتے ہوئے156وکٹیں بھی حاصل کر رکھی ہیں ، ایک مستعد فیلڈر خیال کئے جانے والے آل راؤنڈر نے 96 کیچز بھی پکڑے ہیں، انھوں نے گزشتہ سال جون میں ہی اعلان کردیا تھا کہ عالمی کپ کے بعد صرف ٹی-20 کرکٹ میں ملک کی نمائندگی کریں گے۔

ویسٹ انڈیز ٹیم میں کم بیک کے بعد انگلینڈ کے خلاف 4 اننگز میں 424 رنز بنانے والے کرس گیل نے بھی رواں سال کے آغاز میں ہی اعلان کر دیا تھا کہ عالمی کپ کے بعد ونڈے انٹرنیشنل نہیں کھیلیں گے۔

اپنے کرکٹ کرئیر کے دوران بار بار انجریز کا شکار ہونے کے باوجود دنیا کے تیز ترین اور خطرناک تیز گیندبازوں میں شمار کئے جانے والے ڈیل اسٹین نے بھی گزشتہ سال جولائی میں اعلان کردیا تھا کہ وہ ورلڈ کپ کے بعد ونڈے کرکٹ کو خیرباد کہہ دیں گے۔ ( فائل فوٹو : اے ایف پی ) ۔

ایک اور جنوبی افریقی اسٹار جے پال ڈومنی نے بھی انجریز کا مقابلہ کرنے کے باوجود 5047رنز جوڑے ہیں ۔ کفایتی بولنگ کی صلاحیت بھی رکھتے ہیں ۔ آل راؤنڈر میگا ایونٹ کے بعد صرف ٹی ٹوئنٹی میچز کھیلیں گے۔

ون ڈے کرکٹ میں جنوبی افریقہ کے سب سے کامیاب اسپنر عمران طاہر نے 162شکار کر رکھے ہیں ۔ انھوں نے بھی ورلڈکپ کے بعد خود کو ٹی ٹوینٹی کرکٹ تک محدود کرنے کا اعلان پہلے ہی کردیا تھا۔