سلامی بلے باز شیکھر دھون کو لے کر انگلینڈ سے آئی بری خبر ، جان کر مایوس ہوجائیں گے ہندوستانی فینس

آئی سی سی کرکٹ ورلڈ کپ 2019 میں ٹیم انڈیا کو بڑا جھٹکا لگا ہے ۔ پی ٹی آئی کی خبر کے مطابق ہندوستان کے سلامی بلے باز شیکھر دھون چوٹ کی وجہ سے اس میگا ایونٹ سے باہر ہوگئے ہیں ۔ دھون کو آسٹریلیا کے خلاف میچ میں پیٹ کمنس کی گیند پر انگوٹھے میں چوٹ لگ گئی تھی ۔

شیکھر دھون کو چوٹ لگنے کے بعد ٹیم انڈیا کی جانب سے جاری بیان میں بتایا گیا تھا کہ وہ ٹورنامنٹ کے آخری میچوں تک فٹ ہوسکتے ہیں ، لیکن اب وہ ٹورنامنٹ سے باہر ہوگئے ہیں ۔ شیکھر دھون کی جگہ پر بائیں ہاتھ کے وکٹ کیپر بلے باز ریشبھ پنت کو ٹیم میں شامل کیا گیا ہے ۔

شیکھر دھون کا باہر ہونا ٹیم انڈیا کیلئے بری خبر ہے ۔ دھون اس ورلڈ کپ میں صرف دو ہی میچ کھیل سکے ۔ پہلے میچ میں دھون نے جنوبی افریقہ کے خلاف 12 گیندوں پر 8 رن بنائے ، لیکن دوسرے میچ میں انہوں نے شاندار سنچری بنائی ۔

شیکھر دھون نے دوسرے میچ میں آسٹریلیا کے خلاف 109 گیندوں پر 117 رنوں کی شاندار اننگز کھیلی ۔ حالانکہ اسی اننگز کے دوران انہیں چوٹ لگی ، لیکن وہ درد میں ہی کھیلتے رہے اور شاندار سنچری بنائی ۔

شیکھر دھون آئی سی سی ٹورنامنٹس میں کچھ الگ ہی رنگ میں نظر آتے ہیں ۔ دھون کا ورلڈ کپ میں 53.70 کا اوسط ہے ۔ وہ اس ٹورنامنٹ میں کل 10 میچوں میں 537 رن بناچکے ہیں۔