کرکٹ شائقین کیلئے بری خبر، ورلڈ کپ میں پاکستان۔ہندوستان کے بیچ نہیں ہوگی ٹکر: جانئے کیوں

بورڈ آف کنٹرول فار کرکٹ ان انڈیا اور پاکستان کرکٹ بورڈ کے درمیان جاری گھماسان کا خمیازہ مداحوں کو بھگتنا پڑ سکتا ہے۔ ہندوستان اور پاکستان کے درمیان آئی سی سی ون ڈے ورلڈ کپ 2023 کے میچ پر بحران کے بادل چھا گئے ہیں۔

بی سی سی آئی اور پی سی بی کے درمیان جاری تنازع پھر زور پکڑ گیا ہے۔ ہندوستان پہلے ہی واضح کر چکا ہے کہ وہ پاکستان میں کوئی ٹورنامنٹ نہیں کھیلے گا۔ بی سی سی آئی کے سیکریٹری جئے شاہ کے اعتراض کے بعد ایشیا کپ کو پاکستان سے باہر کرائے جانے کا فیصلہ کیا گیا ہے۔

ہفتے کو بحرین میں ہونے والے ایشین کرکٹ کونسل کے اجلاس میں ایشیا کپ کے حوالے سے بات نہیں ہوئی حالانکہ پی ٹی آئی نے بتایا ہے کہ ٹورنامنٹ پاکستان میں منعقد نہیں کیا جائے گا۔

پاکستان کرکٹ بورڈ کے صدر نجم سیٹھی ایشیا کپ کو ملک سے باہر کرانے کے معاملے پر برہم ہیں۔ انہوں نے واضح کیا ہے کہ اگر ایسا ہوتا ہے تو وہ 2023 میں ہندوستان میں ہونے والے آئی سی سی ون ڈے ورلڈ کپ میں اپنی ٹیم نہیں بھیجیں گے۔ -اے پی

اگر پاکستان نے ہندوستان جا کر نہ کھیلنے کا فیصلہ کیا تو ورلڈ کپ کے دوران دونوں ممالک کے درمیان میچ دیکھنے والوں کی خواہش ادھوری ہی رہے گی۔ پی سی بی کے سابق چیئرمین رمیز راجہ نے بھی یہی کہا تھا۔ اب موجودہ صدر نے بھی اسے دہرایا ہے۔-AP