بڑا انکشاف : ریٹائرمنٹ کا اعلان کرنے کے بعد ایم ایس دھونی کی ایسی ہوگئی تھی حالت!

ہندوستان کو دو مرتبہ ورلڈ کپ دلانے والے کپتان ایم ایس دھونی نے پندرہ اگست کی شام سات بج کر انتیس منٹ پر انٹرنیشنل کرکٹ کو الوداع کہہ دیا ۔ دھونی کے ریٹائرمنٹ کا اعلان کرنے کے کچھ دیر بعد ہی کرکٹر سریش رینا نے بھی ریٹائرمنٹ کا اعلان کردیا ۔

کہا جاتا ہے دونوں لیجنڈوں کو پندرہ اگست کو ریٹائرمنٹ لینے کا فیصلہ اس لئے کیا ، کیونکہ اس سال ہندوستان کی آزادی کو 73 سال پورے ہوئے ور اگر دھونی کی جرسی نمبر سات اور رینا کی جرسی نمبر تین کو ملائیے تو 73 ہی ہوتے ہیں ۔ کرکٹ کی دنیا میں دھونی ور رینا کی دوستی کافی مشہور ہے ۔

میڈیا رپورٹس کے مطابق ریٹائرمنٹ کے اعلان والا دن دونوں کیلئے کافی خاص تھا ۔ ریٹائرمنٹ کا اعلان کرنے کے بعد دونوں نے ایک دوسرے کو گلے لگایا اور کافی روئے ۔ یہی نہیں اس رات پارٹی بھی کی ۔ چنئی سپرکنگس نے بھی ان کے اعلان کے بعد کا ایک ویڈیو سوشل میڈیا پر شیئر کیا تھا ۔

ایم ایس دھونی کی اہلیہ ساکشی نے بھی انسٹاگرام پر دھونی کی تصویر شیئر کرتے ہوئے کہا تھا کہ انہوں نے اپنے پیش کو الوداع کہتے ہوئے اپنے آنسووں کو روکے رکھا ہوگا ۔

ساکشی نے کہا تھا کہ آپ نے جو کچھ بھی حاصل کیا ، اس پر آپ کو فخر ہونا چاہئے ۔ کھیل کو اپنا بیسٹ دینے کیلئے مبارکباد ۔ مجھے آپ کی حصولیابیوں پر اور بطور انسان آپ پر فخر ہے ۔ مجھے یقین ہے کہ اپنے پیشن کو الوداع کہتے ہوئے آپ نے اپنے آنسووں کو روکے رکھا ہوگا ۔

دھونی نے انٹرنیشنل کرکٹ سے ریٹائرمنٹ کا اعلان کردیا ہے ، مگر وہ آئی پی ایل کھیلتے رہیں گے ۔ ایم ایس دھونی کے ایک قریبی دوست ارون پانڈے نے بھی کہا تھا کہ دھونی انڈین پریمیئر لیگ کے اگلے دو یا تین سیزن کھیلیں گے ۔ انہوں نے کہا کہ وہ کم سے کم کچھ اور سالوں کیلئے کھیلیں گے ۔

قابل ذکر ہے کہ دھونی نے بطور کپتان ہندوستان کو سال 2007 میں ٹی ٹوینٹی ورلڈ کپ ، 2011 میں ون ڈے کرکٹ ورلڈ کپ اور 2013 میں چمپئنز ٹرافی دلائی ۔

ہندوستان نے مہندر سنگھ دھونی کی کپتانی میں جتنی کامیابی حاصل کی ، شاید ہی کسی ہندوستانی کپتان کے پاس اتنا بڑا ریکارڈ ہو ۔ تصویر : انسٹاگرام ۔

ایم ایس دھونی کے ریٹائرمنٹ کے اعلان نے ایک جانب جہاں ان کے چاہنے والوں کو مایوس کیا ، وہیں یہ سوال بھی اٹھ رہا ہے کہ آخر ایسے وقت میں دھونی نے ریٹائرمنٹ لینے کا اعلان کیوں کیا ؟۔ تصویر : انسٹاگرام ۔

مہندر سنگھ دھونی چاہتے تھے کہ وہ ہندوستان کو ایک اور بڑا خطاب دلا کر ریٹائرمنٹ کا اعلان کریں گے ۔ اس کیلئے وہ ٹی ٹوینٹی ورلڈ کپ کا انتظار بھی کررہے تھے ، لیکن کورونا وائرس نے ان کی ساری پلاننگ پر پانی پھیر دیا ۔ ٹی ٹوینٹی ورلڈ کپ ملتوی کردیا گیا اور دھونی جس طرح سے کرکٹ کو الوداع کہنا چاہتے تھے وہ نہیں ہوسکا ۔ تصویر : انسٹاگرام ۔

مہندر سنگھ دھونی کے ریٹائرمنٹ کے اعلان پر ٹیم انڈیا کے سابق کپتان سنیل گواسکر نے کہا کہ دھونی کافی وقت سے آئی پی ایل ٹی ٹوینٹی فارمیٹ کا انتظار کررہے تھے ۔ کورونا نہ ہوت تو آئی پی ایل مارچ اپریل میں ہوتا ۔ آئی پی ایل میں ان کی اچھی پرفارمنس ان کیلئے ٹی ٹوینٹی ورلڈ کے دروازے کھول دیتی ۔

گواسکر نے کہا کہ دھونی کی چاہت تھی کہ وہ ہندوستان کو اگلا ٹی ٹوینٹی ورلڈ کپ دلانے کے بعد ریٹائرمنٹ کا اعلان کردیتے ۔ مگر کئی مرتبہ کچھ چیزیں آپ کے ہاتھ میں نہیں ہوتی ہیں ۔ کورونا وائرس نے سب کچھ برباد کردیا ۔

گواسکر نے کہا کہ کورونا وائرس کو لے کر جس طرح کے حالات ہیں ، اس کو دیکھنے سے لگتا ہے کہ ٹی ٹوینٹی ورلڈ کپ اب اگلے سال ہی ہوپائے گا ۔

گواسکر نے کہا کہ دھونی کو پتہ تھا کہ تب تک بہت دیر ہوچکی ہوگی ۔ دھونی جس طرح سے کرکٹ کو الوداع کہنا چاہتے تھے ، وہ ممکن نظر نہیں آرہا تھا ۔ یہی وجہ ہے کہ انہوں نے اچانک ریٹائرمنٹ کا اعلان کردیا ۔

خیال رہے کہ مہندر سنگھ دھونی کے انٹرنیشنل کرکٹ کو الوداع کہنے کے گھنٹے بھر بعد ہی ایک بڑا آفر مل گیا ۔ سابق آسٹریلیائی کرکٹ اور دی ہنڈریڈ لیگ کی ٹیم لندن اسپرٹ کے چیف کوچ شین وارن نے انہیں اپنی اس ٹیم سے کھیلنے کا آفر دیا ہے ۔ یہ ٹورنامنٹ اگلے سال انگلینڈ میں ہوگا ۔

دی ہنڈریڈ انگلینڈ کرکٹ بورڈ کا ایک مقابلہ جاتی ٹورنامنٹ ہے ، جو اس سال آٹھ ٹیموں کے ساتھ لانچ ہونے والا تھا ۔ حالانکہ ہر ٹیم کی طرف سے ۱۰۰ گیند والے اس ٹورنامنٹ کو کورونا وائرس کی و جہ سے اگلے سال تک کیلئے ملتوی کردیا گیا ہے ۔

ایم ایس دھونی نے انٹرنیشنل کرکٹ سے ریٹائرمنٹ کا اعلان کردیا ہے ، مگر دو مرتبہ کے ورلڈ کپ فاتح کپتان دھونی آئی پی ایل کھیلتے رہیں گے ۔ حالانکہ ایسی بھی خبر آرہی ہے کہ وہ فرنچائزی بیسڈ ٹورنامنٹ کھیل سکتے ہیں ۔

دھونی نے آئی پی ایل کی تیاری کیلئے چنئی پہنچنے کے اگلے دن اپنا بڑا فیصلہ انسٹاگرام کے ذریعہ بتایا ۔ انہوں نے ایک ویڈیو شیئر کرتے ہوئے کہا کہ انہیں شام سات بج کر انتیس منٹ سے ریٹائرڈ مان لیا جائے ۔

خیال رہے کہ گزشتہ سال انگلینڈ میں ہوئے ورلڈ کپ میں نیوزی لینڈ کے ہاتھوں سیمی فائنل میں ملی شکست کے بعد سے ہی دھونی کرکٹ سے دور تھے ۔

انہوں نے اس دوران گھریلو میچ بھی نہیں کھیلا تھا اور فوج کے ساتھ ٹریننگ کرنے کیلئے چلے گئے ۔

حالانکہ مانا جارہا تھا کہ وہ ٹی 20 ورلڈ کپ میں نظر آئیں گے ، مگر کورونا وائرس کی وجہ سے آسٹریلیا میں ہونے والے ورلڈ کپ کو ملتوی کردیا گیا ، جس کے بعد ان کے مستقبل کو لے کر قیاس آرائی ہونے لگی تھی ۔

ایم ایس دھونی نے 2004 میں بنگلہ دیش کے خلاف ون ڈے میچ سے انٹرنیشنل کرکٹ میں قدم رکھا تھا ۔ تصویر : انسٹاگرام ۔

دھونی نے ہندوستان کی طرف سے 90 ٹیسٹ ، 350 ون ڈے اور 98 ٹی 20 میچ کھیلے ۔ تصویر : انسٹاگرام ۔

350 ون ڈے میچوں میں انہوں نے 10 ہزار 773 رن بنائے ، جس میں ان کا سب بڑا ذاتی اسکور ناٹ آوٹ 183 ہے ۔ تصویر : انسٹاگرام ۔

انہوں نے ون ڈے کرکٹ میں 10 سنچریاں اور 73 نصف سنچریاں بنائیں جبکہ 98 ٹی 20 میچوں میں انہوں نے 1617 رن بنائے ، جس میں دو نصف سنچریاں شامل ہیں ۔ تصویر : انسٹاگرام ۔

دھونی نے آخری انٹرنیشنل میچ گزشتہ سال نو اور دس جولائی کو نیوزی لینڈ کے خلاف ورلڈ کپ سیمی فائنل میں کھیلا تھا ۔ تصویر : انسٹاگرام ۔