شبھمن گل نے 15 دنوں میں کیا بڑا کارنامہ، پہلے ڈبل سنچری اور اب ٹی 20 سنچری بنائی، کوہلی اور سچن سے نکلے آگے

شبھمن گل کا بلا رکنے کا نام نہیں لے رہا۔ انہوں نے نیوزی لینڈ کے خلاف تیسرے اور آخری ٹی ٹوینٹی میچ میں شاندار سنچری بنائی ۔ یہ ان کی ٹی ٹوینٹی انٹرنیشنل کی پہلی سنچری ہے۔ وہ ہندوستان کیلئے سب سے بڑا ذاتی اسکور بنانے والے کھلاڑی بھی بن گئے ہیں۔ (AP)

23 سالہ گل میچ کا آغاز کرنے آئے اور آخر تک آؤٹ نہیں ہوئے۔ انہوں نے 63 گیندوں کا سامنا کیا اور 200 کے اسٹرائیک ریٹ سے ناٹ آوٹ 126 رنز بنائے۔ انہوں نے اپنی اننگز میں 12 چوکے اور 7 چھکے لگائے۔ یعنی 90 رنز صرف باؤنڈری سے بنائے ۔ (AP)

شبھمن گل کا ٹی ٹوینٹی انٹرنیشنل کا یہ صرف چھٹا میچ ہے۔ اس سے پہلے وہ نصف سنچری بھی نہیں بنا سکے تھے۔ انہوں نے 5 میچوں میں 15 کی اوسط سے 76 رنز بنائے تھے۔ 46 رنز ان کا بہترین اسکور تھا۔ یہ ان کی اوور آل ٹی ٹوینٹی کی دوسری سنچری ہے۔ (BCCI TWITTER)

اس سے پہلے گل نے 18 جنوری کو نیوزی لینڈ کے خلاف پہلے ون ڈے میں ڈبل سنچری بنائی تھی۔ وہ ایسا کرنے والے سب سے کم عمر بلے باز بن گئے تھے۔ انہوں نے 149 گیندوں پر 208 رنز بنائے تھے۔ اب یکم فروری کو سنچری بنائی۔ یعنی 15 دنوں میں انہوں نے اکیلے ہی کیوی ٹیم کو شکست دیدی۔ (AP)

گل سے پہلے ٹی ٹوینٹی انٹرنیشنل میں ہندوستان کیلئے سب سے بڑی اننگز کھیلنے کا ریکارڈ وراٹ کوہلی کے نام تھا۔ کوہلی نے گزشتہ سال ٹی ٹوینٹی ایشیا کپ کے دوران افغانستان کے خلاف ناٹ آوٹ 122 رنز بنائے تھے۔ اب گل نے کوہلی کو پیچھے چھوڑ دیا ہے۔ (BCCI Twitter)

ٹی ٹوینٹی انٹرنیشنل کی بات کریں تو گل سے پہلے وراٹ کوہلی، روہت شرما، سوریہ کمار یادو، سریش رینا، دیپک ہوڈا اور کے ایل راہل ہندوستان کے لئے سنچریاں بنا چکے ہیں۔ روہت نے یہ کارنامہ 4 مرتبہ انجام دیا ہے جبکہ سوریہ نے 3 مرتبہ یہ کارنامہ انجام دیا ہے۔ راہل نے بھی 2 سنچریاں بنائی ہیں۔ (AP)

شبھمن گل نے ون ڈے میں 208 رنز بنائے تھے۔ وہ اس معاملہ میں سچن سے بھی آگے نکل گئے ہیں۔ سچن نے جنوبی افریقہ کے خلاف ناٹ آوٹ 200 رنز بنائے تھے۔ ہندوستان کیلئے وریندر سہواگ، ایشان کشن اور روہت شرما بھی ون ڈے میں ڈبل سنچریاں بنا چکے ہیں ۔ (Indiancricketteam/instagram)