Happy Birthday Irfan Pathan: جب پہلے ہی اوور میں ہیٹ ٹرک لے کر عرفان پٹھان نے پاکستان میں مچادی تھی سنسنی

ہندوستانی کرکٹ ٹیم کے سابق آل راونڈر عرفان پٹھان آج اپنا 36 واں یوم پیدائش منارہے ہیں ۔ گجرات میں پیدا ہوئے اس کرکٹر نے ہندوستان کیلئے کئی یادگار کارکردگیوں کا مظاہرہ کیا ہے ، لیکن انہیں سب سے زیادہ یاد 2006 کے پاکستان دورہ کیلئے کیا جاتا ہے ۔

عرفان پٹھان نے سال 2006 میں پاکستان کے دورے پر کراچی میں کھیلے گئے تیسرے ٹیسٹ میچ کی پہلی ہی اننگز میں ہیٹ ٹرک لے کر تہلکہ مچادیا تھا ۔ عرفان نے اس میچ میں کل چھ وکٹ لئے تھے ۔ پٹھان نے پہلی اننگز میں پانچ وکٹ اور دوسری اننگز میں ایک وکٹ لیا تھا ۔

پہلی تین گیندوں پر کوئی رن نہیں بنا اور پھر اس کے بعد سلمان بھٹ نے باہر جاتی گیند کو چھیڑا اور راہل دراوڑ کو کیچ تھما بیٹھے ۔ اس کے بعد بلے بازی کرنے آئے یونس خان ایل بی ڈبلیو ہوگئے ۔ پھر محمد یوسف کو پٹھان نے ایک اور ان سوئنگر پھینکی اور گیند سیدھی ان کے اسٹمپس سے جا ٹکرائی ۔

عرفان پٹھان ، ہربھجن سنگھ کے بعد ٹیسٹ کرکٹ میں ہندوستان کی جانب سے ہیٹ ٹرک لینے والے دوسرے گیند باز بن گئے ۔ اس سال کی شروعات میں انہوں نے ریٹائرمنٹ کا اعلان کیا تھا ۔