پونے میں آئی پی ایل بیٹنگ ریکٹ کا پردہ فاش، بین الاقوامی سطح کے دو سٹے باز گرفتار

پونے سٹی پولیس نے اتوار کی رات بین الاقوامی سطح کے دو کرکٹ سٹے بازوں IPL betting Racket سمیت کئی لوگوں کو گرفتار کیا ہے۔

پولیس نے ملزم سے 93 لاکھ روپے سے زائد رقم ضبط کی ہے۔

اس کارروائی کے دوران سٹہ کنگ گنیش بھوٹڈا اور اشوک جین کے ساتھ کئی لوگوں کو پکڑا گیا ہے۔ سمرتھ اور مارکیٹ یارڈ تھانوں میں رات گئے تک مقدمہ درج کرنے کا کام جاری تھا۔

گنیش بھٹڈا کو سمرتھ تھانے کی حدود میں منگل پیٹھ میں ایک جگہ پر چھاپہ مارنے کے بعد گرفتار کیا گیا اور اس سے 92 لاکھ 65 ہزار روپے کی نقدی ضبط کی گئی جبکہ اشوک جین نامی ایک سٹے باز کو مارکیٹ یارڈ سے گرفتار کیا گیا۔

اس سے 51 ہزار روپے ضبط کئے گئے ہیں۔ گنیش بھٹڈا ملک کا سب سے بڑا کرکٹ سٹے باز ہے۔

اشوک جین بھی بہت مشہور سٹے باز ہے۔ اتوار کو آئی پی ایل IPL 2021 میں دو بڑے میچ تھے۔ اس لئے پولیس کمشنر امیتابھ گپتا نے بڑے پیمانے پر سٹے بازی کے بارے میں معلومات حاصل کیں۔

انہوں نے افسران کو فوری کارروائی کا حکم دیا۔ اس کے مطابق جوائنٹ کمشنر آف پولیس رویندر شسوے کی رہنمائی میں کرائم برانچ کے انچارج ایڈیشنل کمشنر پولیس بھاگیشری نواٹکے ، ڈی سی پی سرینواس گھاڈگے ، پرینکا نارنورے ، سوشل سیکورٹی سیل اور کرائم برانچ کی ٹیم نے اسی وقت یہ کارروائی کی۔

گنیش بھٹڈا اور اشوک جین سے موبائل اور دیگر اشیاء ضبط کرلی گئی ہیں جس کی قیمت کروڑوں روپے بتائی جاتی ہے۔