بابر اعظم نے لگایا ریکارڈوں کا انبار، وراٹ-گانگولی کو پیچھے چھوڑا، سنچری لگانے پر دکھایا بڑا دل

ویسٹ انڈیز کےخلاف ملتان میں کھیلے گئے پہلے ونڈے مقابلے میں پاکستان کے کپتان بابر اعظم نے ریکارڈوں کی جھڑی لگا دی ہے۔ بابر اعظم بطور کپتان سب سے تیز 1000 رن بنانے والے کھلاڑی بن گئے ہیں۔ یہ کارنامہ انہوں نے 13 اننگوں میں کیا۔ اس سے پہلے یہ ریکارڈ وراٹ کوہلی کے نام تھا۔ (AFP)

بابر اعظم نے ویسٹ انڈیز کے خلاف 109 گیندوں میں نو چوکے کی مدد سے 103 رنوں کی اننگ کھیلی۔ اس اننگ کے ساتھ ہی بابر اعظم عالمی کپ سپر لیگ میں 1000 رن بنانے والے پہلے کھلاڑی بن گئے ہیں۔ (AFP)

وراٹ کوہلی نے بطور کپتان 17 اننگوں میں 1000 رن بنائے تھے۔ وہیں، ہندوستان کے سابق کپتان اور اب بی سی سی آئی صدر سوربھ گانگولی نے یہ کارنامہ 22 اننگوں میں انجام دیا تھا۔ (AFP)

بابر اعظم نے دوسری بار مسلسل تین اننگوں میں سنچری لگائی ہے۔ ایسا کرنے والے وہ کرکٹ کی دنیا میں واحد بلے باز ہیں۔ بابر اعظم نے گزشتہ پانچ اننگوں میں 103، ناٹ آوٹ 105، 114، 57 اور 158 رنوں کی اننگ کھیلی ہے۔ (AFP)

بابر اعظم نے سنچری لگانے کے بعد بڑا دل دکھایا۔ انہیں ‘مین آف دی میچ‘ منتخب کیا گیا۔ تاہم بابر اعظم نے یہ ایوارڈ ساتھی کھلاڑی خوش دل شاہ کو دے دیا۔ خوش دل شاہ نے مشکل وقت میں 23 گیندوں میں ایک چوکے اور چار چھکے کی مدد سے ناٹ آوٹ 41 رنوں کی اننگ کھیلی۔ (AFP)

بابر اعظم نے 87 ونڈے میں تقریباً 60 کی اوسط سے 4364 رن بنائے ہیں۔ انہوں نے 17 سنچری کے علاوہ 18 نصف سنچری بھی لگائی ہے۔ (PIC-Twitter/PakistanCricket)